Tuesday, August 20, 2013

Народнае вучылішча ў Налібаках














У 1862 годзе ў Налібаках было заснаванае народнае вучылішча. Гэтая навучальная ўстанова размяшчалася ва ўласным будынку. Яна ўтрымлівалася за сродкі дзяржаўнага казначэйства і мясцовых сялян. Народнае вучылішча з’яўляецца найстарэйшай вядомай навучальнай установай у Налібаках. 

У 1886/87 навучальным годзе ў Налібацкім вучылішчы было 87 школьнікаў (сярод іх усяго 4 дзяўчынкі), у 1900/01 навучальным годзе 95 вучняў (10 дзяўчынак).

Адным з першых настаўнікаў Налібацкага народнага вучылішча быў сын губернскага сакратара Павел Сяргеевіч Мацюшкін. Настаўнічаў у Налібаках і выпускнік Маладзечанскай настаўніцкай семінарыі Пётр Хаванскі. Захавалася інфармацыя пра яго жалаванне: 150 рублёў, хлеба на 50 рублёў і кватэра.



Васіль Рагуля.
У пачатку 1900-ых гадоў настаўнікам у вучылішчы быў Васіль Рагуля, беларускі грамадска-палітычны дзяяч. Пасол польскага сойму ў 1922 і сэнатар польскага сойму 1928 году. У Налібакі ён прыехаў пасля заканчэння Віленскага настаўніцкага інстытуту.

Закон Божы выкладалі ў розны час выпускніі Віленскай каталіцкай семінарыі ксяндзы Баніфацы Раўбіцкі, Ануфрый Сідаровіч і Антон Давыдовіч.



Кс. Давыдовіч. Пробашч налібацкай парафіі з 1896 - лістапад 1907.
Большую частку расходаў неслі сяляне. Яны выдаткоўвалі сродкі на рамонт класаў, набыццё школьнага абсталявання, ацяпленне школы, заробак настаўнікам і інш. Заняткі вяліся на рускай мове, падручнікі таксама былі на рускай мове.

Нярэдка дзеці сялян наведвалі школу нерэгулярна з-за выканання сваіх абавязкаў па хатніх справах.



Паводле кнігі "Памяць. Стаўбцоўскі раён".

No comments:

Post a Comment