Напалеонаўскі камень знайшоўся

Дзякуючы пільнасці аднаго з налібачан, унікальны помнік прысутнасці французскага імператара ў Налібаках удалося захаваць ад разбурэння.

 У чэрвені на нашым блогу з’явілася публікацыя пра знікненне Напалеонаўскага каменя, які некалькі стагоддзяў прастаяў у цэнтры Налібак, побач з праваслаўнай царквой. У допісе пад назвай “Куды знік напалеонаўскі камень” мы прасілі паведаміць тых, хто ведае пра лёс каменя, дзе ён цяпер знаходзіцца. На публікацыю адгукнуўся былы дырэктар Налібацкай сярэдняй школы Міхаіл Жаўнерчык.

Сп. Міхаіл Жаўнерчык сядзіць на Напалеонаўскім камяні.

Паводле спадара Міхаіла, прыблізна 7 гадоў таму ён перавёз Напалеонаўскі камень на тэрыторыю школьнага парка, дзе ён знаходзіцца да сённяшняга дня і, спадзяемся, прастаіць яшчэ не адзін год. Выказваем шчырую падзяку спадару Міхаілу Жаўнерчыку за ініцыятыву і клопат.

Нагадаем, 200 гадоў таму французскі імператар Напалеон Банапарт прайшоў праз Беларусь. Паводле старэйшых жыхароў вёскі, якія пачулі гэта ад сваіх прадзедаў, праходзячы праз Налібакі Банапарт узлез на камень у цэнтры мястэчка і прамаўляў нешта да сваіх жаўнераў. На камяні быў зроблены надпіс на невядомай мове, які немагчыма было прачытаць, за гады ён сцёрся.

Дарэчы, дарога з вёскі праз пучшу на возера Кромань (паміж Налібакамі і Наваградкам) дагэтуль называецца Напалеонаўскім трактам.


ДГ

Здымкі Сяргея Жаўнерчыка